कुलगुरू प्रा. सहानी यांचे मत : प्रा. भूषण भावे यांच्या ‘साहित्य विमर्ष’चे प्रकाशन
प्रतिनिधी
गोवन वार्ता
फोंडा : कोकणी भाषेचे संवर्धन व विकासासाठी भाषिक तसेच तिच्या उच्चारांविषयी संशोधनाची गरज असल्याचे मत गोवा विद्यापीठाचे कुलगुरू प्रा. अरुण सहानी यांनी व्यक्त केले. कोकणी भाषेत हिंदी शब्दांची सरमिसळ होत असल्याने संशोधनाची आवश्यकता असल्याचे त्यांनी सांगितले.
कोकणी लेखक प्रा. भूषण भावे यांच्या ‘साहित्य विमर्ष' या कोकणी लेखसंग्रहाचे फर्मागुडी येथे आयोजित कार्यक्रमात प्रकाशन करण्यात आले. या समारंभात ते बोलत होते. यावेळी फोंड्याचे आमदार रवी नाईक, अॅड. उदय भेंब्रे, प्रा. किरण बुडकुले, प्रकाश धारवटकर, विकास पिसुर्लेकर, गुरुनाथ खानोळकर व डॉ. एस. एन. मामलेदेसाई उपस्थित होते.
कोकणी ही अल्पसंख्य भाषा आहे. तिचे रक्षण व विकास करण्यासाठी ती योग्यपणे समजून घेतली पाहिजे. अल्पसंख्य भाषांमध्ये हिंदी भाषेतील शब्द घुसडले जात आहेत. साहित्य संशोधन महत्त्वाचे असले तरी भाषेचे संशोधन आम्ही करीत नसतो. लिहिल्या जाणाऱ्या आणि बोलल्या जाणाऱ्या शब्दांत फार मोठा फरक असतो. लिखित शब्द हे झाडाच्या मुळा सारखे असतात हे जाणून घ्यायला हवे, असेही प्रा. सहानी यांनी सांगितले.
कोकणी भाषेतील शब्दांत विविधता आढळते. या शब्दांचा संग्रह करण्यासाठी भाषिक व उच्चार यात संशोधन करायला हवे. ते करण्यासाठी विद्यार्थ्यांना प्रोत्साहित करायला हवे. ज्ञानाची निर्मिती महत्त्वाची असते. आर्थिक मदत देऊन सर्जनशील लेखनाला प्रोत्साहन द्यायला हवे, असे मतही त्यांनी मांडले. यावेळी आमदार रवी नाईक, किरण बुडकुले व भूषण भावे यांनीही विचार मांडले.