कर्तव्यदक्ष आयुक्त शेषन

Story: अग्रलेख-२ | 12th November 2019, 06:00 Hrs

कठोर आणि शिस्तप्रिय व्यक्ती म्हणून देशाला परिचित झालेले माजी मुख्य निवडणूक आयुक्त टी. एन. शेषन यांची कारकीर्द केवळ वादळी होती असे म्हणता येणार नाही, तर त्याला विविधतेची किनार लाभली होती. आयएएस अधिकारी असलेले शेषन एक सच्चे पर्यावरणप्रेमी होते, त्यामुळे ते नेहमी हिरवी टोपी वापरत असत. त्यांची प्रशासकीय कारकीर्द केंद्रात पर्यावरण सचिव म्हणून सुरू झाल्याने कदाचित त्यांना पर्यावरणाबद्दल आस्था असावी. चंद्रशेखर पंतप्रधानपदी असताना डॉ. सुब्रह्मण्यम स्वामी कायदा मंत्री होते, त्या अल्पकाळात निवडणूक आयुक्तपदी शेषन यांची नियुक्ती करण्यामागे डॉ. स्वामींचे प्रयत्न होते. त्यापूर्वी शेषन पंतप्रधान राजीव गांधी यांच्या काळात कॅबिनेट सचिव या महत्त्वाच्या पदावर होते. निवडणूक आयुक्त म्हणून त्यांचा कालावधी विशेष गाजला, कारण नावापुरती असलेली आचार संहिता त्यांनी प्रत्यक्षात कडकपणे राबविली. लोकशाही मूल्ये आणि निवडणूक सुधारणा यावर त्यांनी सतत भर दिला. सहा वर्षांत त्यांनी आयोगाचा चेहराच बदलला. केवळ निवडणूक घेणारी यंत्रणा ही प्रतिमा बदलून नियमांवर भर देत अतिशय कठोरपणे राजकारण्यांवर वचक ठेवणारा आयुक्त ही त्यांची खरी ओळख आहे. ‘नाश्त्याला मी राजकारण्यांना खातो’ असे ते विनोदाने म्हणत असत, खरे तर त्यांचा तसा दराराच निर्माण झाला होता. जातीधर्माचे राजकारण किंवा तशा प्रकारची वक्तव्ये आणि भाषणे यांना त्यांनी पूर्णपणे आवर घातला होता. निवृत्तीनंतर स्वत: दोन वेळा निवडणुकीत पराभूत झालेले शेषन कर्तव्यदक्ष अधिकारी म्हणून आदर्श होते, पारदर्शकतेवर भर देणारे होते. त्यांचे अनुकरण करणेही सोपे नाही.                   

Related news

पुन्हा पुतळ्याचे राजकारण

सिक्वेरांच्या पुतळ्याचा विषय तापवत ठेवण्यावर त्यांचा भर असेल. कारण यातूनच फातोर्डा मतदारसंघातील दुरावलेले ख्रिस्ती मतदार पुन्हा जवळ येऊ शकतील असे त्यांना वाटते. Read more

मूल्य शिक्षणात ‘राष्ट्रभक्ती’ संस्काराचे महत्त्व !

युद्धाव्यतिरिक्त इतर जागतिक आर्थिक, आैद्योगिक, सांस्कृतिक, शैक्षणिक, सामाजिक, धार्मिक आक्रमणाविरूद्धही आपल्याला लढाई जिंकता येईल. या सर्व बाजू पाहता राष्ट्रभक्ती ह्या संस्कारमूल्याची महती आपल्याला कळून येईल. Read more

आतबट्ट्याचा रेती व्यवसाय!

कायदेशीर बाबींची पूर्तता करून घेण्यासाठी हे मंत्री का बरे स्वत:चे राजकीय वजन वापरून घेत नाहीत? रेती व्यवसाय बेकायदेशीररीत्या चालू असण्यातच त्यांना रस आहे की काय! Read more