नीलेश काब्राल यांचा राजीनामा, नूतन अध्यक्षांकडे दिला ताबा
पणजीः काँग्रेस पक्ष व आमदारकीचा राजीनामा देऊन भाजपमध्ये नव्याने दाखल झालेले दयानंद सोपटे यांची गोवा पर्यटन विकास महामंडळाच्या अध्यक्षपदी वर्णी लागली आहे. मंत्री नीलेश काब्राल यांनी या पदाचा राजीनामा दिल्यानंतर बुधवारी उशिरा यासंबंधीचे आदेश जारी करण्यात आले. मंत्री काब्राल यांनी गुरुवारी सोपटे यांचे स्वागत केल्यानंतर त्यांनी जीटीडीसीची सूत्रे हाती घेतली.
जनतेमध्ये योग्य संदेश जाण्यासाठीच आपण जीटीडीसीची सूत्रे त्वरित सोपटे यांच्याकडे सोपवली, अशी प्रतिक्रिया यावेळी काब्राल यांनी दिली. गोव्याचे हित राखण्यासाठी तसेच इतर विकासकामे पुढे नेण्यासाठी आपण सोपटे यांना सर्वतोपरी पाठिंबा देणार असल्याची ग्वाही त्यांनी दिली.
जीटीडीसीची सूत्रे हाती घेतल्यानंतर सोपटे यांनी आपण प्रामाणिकपणे काम करणार असल्याचे सांगितले. गोवा एक प्रसिद्ध पर्यटन क्षेत्र असून, त्याची लोकप्रियता वाढत जावी, यासाठी आपण प्रयत्न करणार आहे. सध्या मंजूर झालेली कामे व प्रकल्प पूर्ण करण्यास प्राधान्य दिले जाणार, असेही ते म्हणाले. मुख्यमंत्री मनोहर पर्रीकर व मंत्री नीलेश काब्राल यांचे त्यांनी आभार मानले.