गोवा फॉरवर्डने आखलेली विस्तार योजना केवळ आठ मतदारसंघांपुरतीच मर्यादित राहील असे समजण्याचे कारण नाही. यापूर्वी मगो पक्ष नेहमीच सत्तेत वाटेकरी राहिला आहे, मात्र पक्ष विस्तारासाठी विशेष प्रयत्न झालेले दिसले नाहीत. याउलट गोवा फॉरवर्डने प्रथमच सत्तेत सहभागी झाल्यावर तीन मंत्र्यांच्या सहकार्याने राज्यातील काही मतदारसंघ हेरून हेतुपूर्वक शिरकाव करण्याचे नियोजन केले आहे. राजकीय पक्षाच्या दृष्टिने पाहाता, वाढीसाठी संघटना नेहमीच उपयुक्त ठरत आली आहे. त्या दिशेने गोवा फॉरवर्डची पावले पडताना दिसतात. यापैकी मये सोडला तर बहुतेक मतदारसंघ हे सध्या बिगरभाजप पक्षांच्या ताब्यात आहेत. सरकारचा घटक असला तरी कोणत्याही पक्षाच्या विस्ताराचा हक्क कोणी हिरावून घेऊ शकत नाही किंवा मर्यादा आणू शकत नाही, हे अगदी खरे आहे. काँग्रेस आणि भाजपला विरोध करीत गोवा फॉरवर्ड प्रादेशिक पक्ष म्हणून पुढे सरसावला तर राष्ट्रीय पक्षांना तो शह देऊ शकतो. गोव्याचे राजकारण यापूर्वी मगो आणि युगो या दोन पक्षांभोवतीच फिरत होते. पुन्हा एकदा प्रादेशिक अस्मिता जागविण्याचे प्रयत्न सुरू आहेत, असे दिसते.
