पणजी : येथील फेरी धक्क्याजवळ पणजी पोलिसांनी छापा घालून अमली पदार्थ बाळगल्या प्रकरणी एका युवकाला अटक करून त्याच्याकडून ९० हजार रुपये किमतीचा ९१० ग्रॅम गांजा जप्त केला आहे. पणजी पोलिसांनी दिलेल्या माहितीनुसार, गुप्तचरांच्या माहितीवरून दि. १० आॅगस्ट रोजी दुपारी २ वाजता ते सायं. ५ वाजता दरम्यान फेरी धक्क्याजवळ सापळा रचून छापा घातला. यावेळी पोलिसांनी ९० हजार रुपये किमतीचा ९१० ग्रॅम गांजा जप्त केला. तसेच पथकाने दुर्गावाडी - ताळगाव येथे राहणारा सुरेश विठ्ठल केसरकर (२७) याला अटक केली. केसरकर याला पोलिस कोठडीसाठी शुक्रवारी पणजी प्रथमवर्ग न्यायालयात हजर करण्यात येणार आहे.
या प्रकरणी पोलिसांनी अमली पदार्थ कायदा १९८५च्या कलम २२(बी) आयआय (बी) कलमानुसार गुन्हा दाखल केला आहे. या प्रकरणी अमली पदार्थ विरोधी पथकाचे उपनिरीक्षक विजय चोडणकर पुढील तपास करीत आहेत.
